INFO SEHAT

Minggu, 29 November 2009

KICAK LAWAN BUHA


Mak urung penginjuk ni Susno Duaji "Cicak VS Buaya" tekena di diri na tenggalan, mak ni hahilu na kecawanna di bulan Juni 2009 jadi kenyataan di bulan November 2009. Jabatanna sebagai orang ketiga di Kepolisian haga mak haga ni pukah ko hulun, penarak ni ketaposan na lawan 'Bibit - Candra' sai ni injuk ko na lawan kicak, dang nihan cacuba ngelawan Kepolisian sai ni injuk ko na lawan buha. Buttu akal kicak haga menang lawan buha.

Asing lamon ni kicak tattu ratta kalah kik haga ngelawan buha. Bagi ni buha kicak injuk makin ha' ti ngangngal cara nganik ya. Ti irus rayya sekali irus tattu muluhan kicak kuruk lom tenai na. Kidang kicak lunik ga kik haga ni kanik buha ... mak temon buha haga betong nganik ya.

Kidang sekali hijjo haga mak haga Susno temon do tugak ..., penarak ni kicak ruwa hinno Susno passan. Jenderal hijjo tanno nonjob, mak ngedok pakkuk. Taturik na sehinggo Bibit - Chandra ti takkok, ya kindo kesalahan ni jamma ruwa hinno makkung ngedok bukti. Hasil rekaman kici'an ni Anggodo sai ni sadap KPK ngebuktikon wat konspirasi haga ngejahal ko Bibit - Chandra, seolah terawwa radu nerima duwit anjak Anggodo. Kidang uccuk uccuk na tian mak ngedok saksi sapa sai mara ko duwit kemanno lawan Bibit - Chandra.

Tuduhan lawan Bibit - Chandra sai nyalahguna kon jabatan temon temon mak terbukti, sehingga terawwa ti bebas ko luwot. Setemon na dapok mak makin ha' ranno ... paperadda penegak hukum ..., dapok makin ha' sebabinji'an. Perallu rasa na ngelaksana kon "Praduga Tak Bersalah" dang jahal semok, api lagi haga nyasani bukti, nyalah salah kon kedua sai mak ngedok bukti salah.

Wat cerita barih ... wat babai tuha di Sragen sai ni hukum tian tengah ruwa bulan mana ngakuk telu m'biji buah Kakau sai kakirana dapok ti ragga ko Rp.20.000. Kidang mana babai tuha hijjo mak lebih anjak kicak jadi sehahaga ruppok haga melok gundang na.

Sabtu, 28 November 2009

KIK PAK RAYYA KIDANG DANG RAYYA


Judul hijjo terjemahan anjak "Yen ngono ning ojo ngono" hijjo filosofi komunikasi ni kultur Jawa. Mana kak jamma Jawa cawa ... api lagi ngicik ko hal hal sai penting menyangkut jamma jamma terhormat maka di lom kici'an perallu ngimat ... dang sappai wat sai sikkuh na. Kik pak temon do rayya ... kidang dapok nihan makin ha' ti cawa ko rayya di lom bahasa ni tian nicawakon tian yeng ngono ning ojo ngono.

Falsafah hinno sai ni pakai SBY di lom ngicik kon perkara rekomendasi ni tim walu. SBY ngerasa perallu ngimat ... kidang tatu SBY buharap terhadap ni Kapolri rik Kejagung dapok ngeratti di filosofi hijjo ... tian perallu pandai bahwa SBY jo ti balak ko di kultur Jawa ... hinggo filosofi na munih tattu filosofi Jawa. Api sai ni kicik ko SBY yaddo wat ratti na sai setemon na mak bangik ketengis na dihadap jamma ramik. SBY mak sikop ngicik terus terang lawan jamma ramik ... kidang haga na Kapolri rik Kejagung dapak paham api sai ni maksudko SBY, rik ha' langsung ti tindaklanjuti carana.

Wat kesenian di jawa sai geral na "Mataraman" seni mataramn hijjo ramik ngedemoni ya ... mana lucu nyani kelalangan manjangan rayya ... induh induh api sai ni kicik ko tian di panggung kidang sai nengis ya tehanggat lalang. Kidang kanah kak masing masing radu mulang mit lamban appai na kicik angon oh jadi halok hinno sai ni maksud ko mataraman jinna. hal injuk ranno ti harap dapok ni angon ko Hendarman Supanji tian rua no.

Jumat, 27 November 2009

NIKOL KURBAN


Bagi ni tian sai mampu mesikop nikol kurban di hari raya kurban. Mesikop kurban hijo jamma sai bagi sai tikolan kambing, jamma pitu untuk nikol sapi atau kebau. Kik ram mak mampu dapok nikol kambing sai atas nama keluarga ... anak kehajjong ..., kidang kik sang pekon hinno ikah wat kambing sai maka kambing sai hinno ti tikol sebagai korban atas nama jamma sang pekon ... pengahut lawan tian sai mak mampu di pekon hinno.

Kidang api ha' cawa ngicuh na ... tanno jo lamon jaman mampu sai lelawa sejar na ... kik pak kambing sai mek ngedok sai ti tikol atas nama keluarga na. Rik mak nihhan ngedok kelioman mana munih ia buharap haga massa kupon daging kurban.

Jamma hijjo ni cawakon tuhan mendustakon agama ... tianno yaddo menyia nyiakan anak yatim rik jamma miskin. Lagi wat waktu bagi ram sai mampu untuk nyippok kambing untuk ti tikol ... sangon buka di rani jemahat kidang waktu nikol ya dapaok ti laksanakan kik pak rani mingu ya. Sappai rani hinno kambing rik sapi maminoan menah ram ratong ngebeli ya.

RUCCAH (luwot)


Pidato ni SBY sai meraruwa mak urung ngeratong ko keruccahan baru. SBY ngimat nyin mak ni tuduh jamma ramik turuk iruh di proses hukum ni Bibit - Chandra kidang ngilu nyin ti selesai ko di luar hukum kik mak cukup bukti ... kidang ti laju ko di persidangan kik cukup bukti. Keliak na pelisi mak haga kelebonan pudak ... begeluk pelisi nyerah ko berkas mit kejaksaan ... pelisi tenggalan mak serta merta natutuk anjuran ni SBY kidang perallu waktu paling mawat telu minggu hinggo wat keputusan kasusu hijjo ti laju ko atau ti taru ko.Akibat na masalah hijjo jadi keruccahan baru.

Keruccahan lain di isan gawoh ... jamma ramik munih ngilu Wapres rik Menteri Keuangan ti non aktif ko mana jamma rua hijjo terlibat langsung di kasus ni Bank century ... mana terawwa no sai ngemutuskon bantuan untuk bank century selamon pitu triliun lebih ... ya kindo keputusan sai setemon na bantuan hinno mak ranno mok na. Jamma ruwa hijjo ni harap jamma ramik mempertanggung jawabkon keputusan hinno di meja sidang. Api lagi bank century tenggalan ngerasa setemon na tian mak merallu ko bantuan mana unyin ni waktu hinno berjalan lancar lancar rayya. Justeru hani tian bank hijo menghadapi kasus mana yaddo setelah massa bantuan sai mak ni butuhkan tian. Rik setelah bantuan hinno luar yaddo nyusul pepira nota nota sai mengakibatkon bank centuri passa. Mana mak laghi kedehol memenuhi perkiluan pencarian dana anjak nasabah nasabah ni bank hinno. Akibat na jadi ruccah luwot.

Injuk rappa reformasi sai ni harap ko SBY bagi ni Kepolisian - Kejaksaan rik BPK. Makkung ngedok petunjuk lebih lanjut. Kepolisian naru ko Kusno Duaji, Kejaksaan makkung ngedok respon rayya munih KPK.

Jamma ramik buharap dang lagi wat keruccahan baru ... melaliom ni tengis hulun barih ...

Kamis, 26 November 2009

NYIMBIN


Uccuk uccuk na Susno Duaji ni taru ko tian anjak jabatan selaku Kabareskrim. Setemon na Ia radu mundur tenggalan andah ni geral na risok ni cawakon tian di lom telepon hasil sadapan KPK di HP ni Anggodo Wijoyo. Di lom telepon niucak ko tian Susno sebagai Truno III. Truno III hijjo yaddo pejabat di Polri sai dapak ti urau kerjasama untuk ngelaksanakon api citta ni Anggodo. Sai kedua Susno ni sebut sebut tian sebagai pejabat sai ngeluarko surat untuk kepentingan ni nasabah bank sai tano jadi kasus balak.

Setemon na Susno radu besuppah bahwa ia mak massa duit anjak api sai radu ni guwai ko na. Kidang ia ngundur ko diri rayya. Kapolri nerima pengunduran diri na untuk sementara ... kidang uccuk uccuk na jabatan ni Susno Duaji temon temon di pukah ko tian. Susno ni kain tian nyimbin mana haga jadi sasaran raribok ni jamma ramik.

Jadi pejabat tanno jo nangon perallu buimat imat ... radu meramik tian sai tepaksa beurusan lawan pengadilan mana kesalahn kesalahan sai setemon na mak perallu. Tanno jo mawat kik injuk tumabai jaman Orde baru ram sehahaga mana pimpinan dapok ngelindungi ram kik ram wat kesalahan .. apilagi kesalahan kemanno sangon ni kain atasan ram.

Selasa, 24 November 2009

SBY MERARUA



Induh ratti na pidato ni SBY sekali hijjo bang merarua, yakindo pidato hinno radu saka ni penah jamma ramik, jamma ramik buharap kak SBY radu nyappai kon sikap resmi pemerittah, maka radu sama radu segala kemeherian. Bang kindo rupa na mawat ..., jajawoh kallah ... Pidato ni SBY mak ngedok isi ... mak ngedok aku'an ..., merarua ... injuk wat sai ni sasegok ko na ... injuk wat kegambangan ... injuk wat keruguian. Injuk gambang wat sai sikkuh ...

Mak ni rassai SBY kuddo jamma ramik radu saka mapenah api sai haga ni cawa ko SBY, jamma ramik buharap kik SBY radu cawa urusan jadi jumalesai ... ti butong sai ti butong na, ti taru ko sai ti taru ko na ... kik wat tian sai mak cok na, kidang urusan hijjo selesai ... kemeherian bela. Kidang kik rajjo cara ni SBY cawa ... hijjo geral na lain nyelesai ko masalah kidang nambah masalah baru.

Salah salah Kepolisian, Kejaksaan rik KPK tanno jadi sekakukkong ... hinno ni pakkal ko SBY mak tegas, injuk ngain kidang lain ngain ... injuk ngehalang kidang lain munih ngehalang. Uccuk uccuk na tian no lain hak nengis ko api cawa ni Presiden sai ngangkat tian no sebagai pembantu Presiden ... kidang tian haga pak nambah nyengagal ya. Mana kecawa'an ni SBY dapok munih ti ratti ko injuk ranno.

Ngakalau SBY geluk sadar ... di kesalahan na, ngakalau pembantu p[embantu na begeluk ngeni pandai di kesalahanna. Dapok makin hak SBY ngelandok pidato na ... kidang langsung rayya ngain Kapolri rajjo ... rajjo ... rajjo ..., ngain Kejagung rajjo rajjo rajjo ..., ngain KPK rajjo rajjo ... rajjo.

Mana lain kik mak ngasi SBY selaku Presiden ngakain tian kemanno ... gila tian kemanno sangun kakayunan ni Presiden ... Ranno kuddo puuuunnn .....

Minggu, 22 November 2009

ANDI ARIEF, ANAK NI PAKNGAH ARIEF MAHYA


Andi Arief, anak ni Pakngah Arief Machya laher di Bandar Lampung tanggal 20 November 1970. Injuk sai ram ramik jejama pandai Wan Arief yaddon tokoh anajka Liwa Lampung Barat, semasa aktif kerajja tumbai beliau Kepala Kandepag Kota Bandar Lampung. Kidang jabatan hijjo mak meramik tian sai pandai, jamma ramik pandai na yaddo Pak Ngah sebagai da'i rik penulis opini tentang keagamaan di koran Lampost.
Cerita tentang Pak Ngah wat sai mak lazim ... nyumang jak sai barih. Yaddo kak Pak Ngah nulis di koran, naskah tulisan na ikah tulis culuk gawoh, kak radu selesai nulis ia nelepon mit Lampus ... kanah jamma Lampos sai ratong mit lamban ni Pak Ngah ngakuk naskah hinno. Raddu sayya appai naskah ni ketik tian luwot rik Langsung ti terbit ko.
Merawan nihhan rasa na nasib tuha ni Pak Ngah. Mana unyin ram pandai bahwa Andi tumbai radu saka passan mana mak setebongan lawan politik ni Orde Baru sehinggo ia niculik tian, Semakkung kena culik Andi jo rappa lindung ... mesallan ti takkok induh rarisok no andi ngeni ceramah di mahasisswa kidang selesai pai guwai hinno ... appai petugas ratong nyippo'i ya, ... pandai pandai Andi radu muncul ni wawancarai BBC.
Semasa sekula na Andi jadi murit kahut ni guru guru rik dosen na. Kidang mana Ia mak setebongan lawan Orde Baru ... jadi Andi ni sani tian injuk kik penjahat cara na. Unyin tian sai kahut lawan Andi jadi musah mana induh radu sesaka na Andi jo mak ngedok kabar ... api ya lagi hurik atau radu matti ... kik lagi hurik dipa rang na ti kurung ... kik ya radu mati dipa rang ni kubur na. Pertanyaan hijjo mak ngedok jawaban na radu hitungan tahun. Kik ikah lima kali radu wat Pak Ngah ni wawancarai BBC.
Selain pintor Andi Jo merawan. Kik hani ruppok acak merawan jak pacak ... kidang andi merawan rik pacak munih. Tanno Ia sehahaga luwar kuruk rangok ni istana keperesidenan ... mana ia ni angkat SBY sebagai staf khusus

Minggu, 15 November 2009

NGELOM


Haga na gila tian sai paperadda penegak hukum no ngicik buyun-uyun nyippok hippa sai benor ..., dapok makin sebabinjik'an ... makin sebudik ... dapok makin nyasippok alasan ... nyin ti cawako benor tenggalan ..., temon tenggalan..., pittor tenggalan ..., sai barih bugu ..., sai barih salah ...! Menapi gila kik paperadda kundur ..., akui kesalahan masing masing ..., terima kebenoran anjak ipa juga asal na.

Kidang penegak hukum Kejaksaan, Kepolisian rik KPK tanno injuk jamma sai ngelom. Seundah undah di kejahalan ni sai barih rik nyasegokkon kesalahan ni masing masing na. Keriloh injuk hijjo tanno mak urung nyani jamma ramik bah mekonan mak ngedok lagi rasa percaya lawan tian ... penegak hukum kemanno ruccah rik nahok nahok pzalas bupengatu pengatu ti cawa ko jamma buyun.

Kik hani Mamak kenut gila tianno radu saka nyadang ..., unyin tian tukang nyadang, kik seandaina tian ngekui rayya radu lamon tenyadang ni tian radu saya kundur ... radu sayya ngilu mahap ... ruccah manjangan hijjo dapok tio selesai ko. Kidang kik masing masing ngerasa paling benor ... radu sayya haga nakkok sai barih. Mula na guawi hijjo tambah riok.

Bukan gila bacak ngelucuk ko jamma salah ... enjak kik nakkok jamma sai mak salah ... !

Kidang tanno tian no unyin ngelom ..., tian mak sudi nengis cawa ni jamma barih ... mana ikah tian sai benor ... ikah tian sai buyun ... mak ni rassai tian tian tanno "ngelom manjangan"

Rabu, 11 November 2009

KEJANGUH


Natengis rekaman hasil penyadapan telepon ni Anggodo temon temon sepelioman ..., kukkoh kabanan jamma tigerali Markus. Tian kemanno nicawakon jamma ramik sebagai Markus atau makelar kausus. Markus, yaddo tian sai kuasa dapok ngejual beli ko kasus ..., ngerarabai saksi ..., ngatur atur api cawa ni saksi di berita acara BAP. Rik kecawaan na ni tengis ko pejabat penegak hukum.

Tatu rayya geral geral ni pejabat kemanno sai ni cacak cacak tian di lom telepon guggoh haguk kejanguh ..., guggoh haguk gagelok ... seundah undah api api sai setemon na perallu ti segok kon. Sai perallu ti sippok rapot rapot. Api lagi kecawaan ni tian no makkung tatu temon ..., sapa pandai tian no sebabudi rik segagunik'an di lom telepon.

Kidang kik pak rayya ya ..., jamma ramik radu nengis radu nyemok ..., macom macom semok ni jamma ramik lawan pejabat kemanno ..., unyin semok kemanno tatu rayya semok jahal ..., api lagi pepira geral sai ti sebut di lom telepon tanno radu kundur anjak jabatan ni tian masing masing.

Jadi semok ni jamma ramik injuk kik temon cara na. Hinno ni pakkal kon kejanguh ...

MARKUS


Mamak Kemut giggir giggir lalang tenggalan ..., mati cikan hana hati na anak na tumbai ni gerali na Markus. Lelawa jahal ni geral Markus tanno jo. Mana Markus istilah penggeral ni tian bagi pihak pihak sai nyani paperadda penegah hukum injuk bagi ni Kepolisian, Kejaksaan rik KPK jadi ruccah ..., sebigongan ..., mak mingan setaguan .., api lagi seanjauan ..., selulihan ..., sebabua, ... ngelahai manjangan.

Anggodo ragah anjak Cina sangon lelawa lamon ni duit na ..., hiyau duit hinna tenguppul na waktu ia jadi broker ni SDSB tumbai ..., radu sayya ni terus ko na bisnis segala bagai. Unyin unyin bisnis na lancar lancar rayya ..., hinno ngebana duit na tanno telabbun perun ...!

Jadi ketika abang na Anggoro Wijoyo wat urusan lawan penegak hukum "KPK" sappai sappai ia tekeba mit di Singapura, Anggodo jo natulung adik na nyin dang kena takkok. Waktu hinno duit ni Anggodo ni bagio bagi ko na lawan penegak hukum asal penegak hukum haga ngakuk keputusan sesuai citta na. Radu sayya fitnah jadi tanui ... Kejaksaan, Kepolisian, KPK, Pembela Hukum jadi burak ulih ni kaus hijjo.

Urusan hijjo jadi irok mana duit sai haga ni keni ko Anggodo lawan penegak hukum ni titip ko na lawan pepira jamma ..., nurut tian sai ketitipan diut hinno radu sappai ... di penegak hukum ... rik tian nutukan ko citta ni Anggoro. Laporan lawan Anggoro sekedau duit ni sappai ko tian makai HP rayya.

Cilaka na telepon ni Anggoro radu ni sadap KPK, sehinggo api sai ni cawa ko tian di HP hinno radu ti rekam unyin. Kidang pelisis yakin nihhan KPK radu massa kiriman duit anjak Anggodo ... jadi tian nakkok Bibit rik Chandra ... tuduhan na yaddo penyalah gunaan jabatan sebagai Wakil Ketua KPK.

Isi ni kecawaan Anggodo lawan rik rik na ..., ngucak kon pelisi rik kejaksaan haga ngatur hukuman bagi Bibit rik Chandra injuk citta ni Anggodo. KPK - Kejaksaan - Kepolisian jadi sebigongan. Ni pakkal kon citta ni Anggodo. Anggodo ni gerali tian Markus (Mafia Kasus)

Selasa, 10 November 2009

MAMAK HAMDAN MERUYUH TUHA

Rani Sabtu tanggal pitu bulan November tahun 2009 Atin Tarmizi, Udo Safruddin terawwa minggoman rik kawwa ina ni sanak nyilau Mamak Hamdan di Kosambi Bandung Jawa Barat ..., lelawa tekanjat ni sikam bang bang Mamak Hamdan tanno temon temon radu jerugguk seratta gerok na. Mak injuk biasana lelawa hanjak ni pemudak na kak sikam nyilau Ia di lamban na ..., keratongan sikam kali hijjo ni sambut na biasa biasa gawoh ..., injuk nyambut tetangga gelir ni lamban. Kidang bagi ni Udo Syafruddin ..., Ia mak tekanjat mana pepira bulan sai likut Ia nelepon Mamak Hamdan ...

Nyak Sayfruddin ...
Syafruddin ipa ... hani mamak hamdan di telepon
Syafruddin Pagelaran ... hani udo
O ... niku tinggal di Pagelaran ... , radu saka ... tinggal disan ... hani Mamak hamdan.
Udo Syafruddin geluk mafhum ... ratti na Mamak Hamdan tanno setengah pikun ...

Dapok ni inong nyak kuddo ... ? Hani atin Tarmizi
O ... ! Hani Mamak hamdan palas cacungguk injuk jamma faham
Nyak jo Tar ... Tarmizi ... !
Oh ... Tarmizi hani Mamak Hamdan ... pemudak na mak berubah ...
Atin ku liak keciwa nihaan mana mak dapok ni inong Mamak Hamdan lagi ...

Nyak haga sembiang hani Atin tarmizi lawan Mamak Hamdan
Ya benyulu di dapur disan ... rik sembiyang niku di kamar no ... timbal ni Mamak Hamdan kebenoran ...

Ku caccan culuk kiri ni mamak Hamdan rik ku pusau pusau pelegohan ... ku liak Ia mehanjak mana culuk na ku pusau ....
Lelawa tekanjat ku mana ia cawa ngedepung ngucak ko Ia tiram nihhan lawan Mamak Ipin sai tinggal di belambangan Umpu Way Kanan ...

"Radu saka nihaan nyak mak petungga Ipin ... "

Terawwa melong hijjop nangon ku pandai radu saka mak petungga ... mana Mamak ipin hunjak hena na jerugguk ...

Mak lulah dia terawwa muari tatu setiraman kirang hantara jawoh ... radu paperadda tuha ... tekacah munih di angangon ...